Добивај вести на Viber
Правни и административни пречки го отежнуваат работењето на странските инвеститори во Македонија, а проблем е и процедурата за обезбедување визи - му се пожалија инвеститорите на министерот за економија Ваљон Сарачини на денешната средба во Стопанската комора на Македонија.
Советот на странски инвеститори сите забелешки ќе ги сумира во „бела книга“ која ќе им ја достави на македонските власти од кои ќе побара да ги намалат бариерите и да ги олеснат процедурите.
„На разговорите беа отворени голем број прашања на кои треба да работиме. Се договоривме да се заврши со подготовката на Белата книга, за да можат министерствата и Владата да работат на натамошно подобрување на состојбата“, изјави Сарачини.
Освен ова, странските инвеститори бараат поголема соработка и од македонските компании, за кои велат дека не ги доживуваат како конкуренција.
„Домашните компании треба да нè дополнуваат за да имаме поуспешен настап на странските пазари на коишто се нудат производите изработени во Македонија“, вели претседателот на Советот на странски инвеститори, Хуан Педро Наваро.
Според податоците на македонската Влада, во 2013 година странските инвестиции продонесоа да се зголеми извозот на странските пазари за 25 отсто повеќе во однос на 2012 година. Очекувањата на Владата се дека Македонија оваа година ќе ја заврши со 350 милиони евра странски инвестиции.