Адвокатот на Кочан тврди дека притворањето е за да се замолчи неговиот медиум

Добивај вести на Viber

Никола Додевски, aдвокатот на Сеад Кочан вели дека целта е да се замолчи неговиот медиум и дека притворањето е повреда на слободната мисла и слободата на говорот. 

„Нема потреба од притвор. Единствената потреба за притвор е тој да биде затворен, а неговиот медиум замолчен. Не знам од кои причини. Обвинителството бара притвор за Сеад Кочан затоа што тој е сопственик на Телевизијата Нова, а не затоа што учествувал на тендер“ - вели Додевски.

Додевски вели дека работата за која е добиена јавната набавка е завршена и за сите, освен за СЈО, и било ирелевантно дали машините кои ги понудил конзорциумот биле земени на лизинг, позајмени или купени. Тој рече и дека бројот на работници кои требало да ги има фирмата што ќе го добие тендерот бил двојно поголем, а не помал . Додевски вели  дека СЈО извадиле погрешна дробилка од интернет, а дека онаа која ја дал Кочан била според спецификациите во тендерот.

Тој ги обвини СЈО  за дискриминаторско однесување кон обвинетите. 

Адвокатот вели дека за Кочан се бара притвор, а за другите осомничени само мерки. 

На денешната седницата на Апелациониот суд за одлука за притвор на Сеад Кочан, одбраната и адвокатот Додевски ги отфрли сите докази доставени од СЈО, како неосновани. 

Судот има 48 часа да донесе одлука, дали ќе го потврди или отфрли притворот на Сеад Кочан за кој, одбраната тврди дека не е во бегство, но не знае каде се наоѓа во моментов. Претходно беше соопштено дека Кочан заминал на службен пат.