Аеродромот на вода не е атрактивен за инвеститорите, Охрид ќе куртули!?!

Добивај вести на Viber

Ако се суди по изразувањето интерес за изградба на хидроаеродромот во Охрид, проектот не е доволно атрактивен за домашните и странските инвеститори. Катерина Попоска И покрај напорите на Министерството за транспорт и врски да привлече концесионер кој би го изградил аеродромот на вода во Охридското Езеро, инвеститорите не се многу заинтересирани за проектот. До зацртаниот рок од Министерството-10 декмври, интерес покажала само една компанија. Надлежните не обелоденуваат која е и од каде е компанијата која за сега е единствената која сака да го изгради хидроаеродромот во Охрид. “По објавеното барање за изразување на интерес за учество во меѓународен повик за изградба на нов аеродром на вода на Охридско Езеро до Министерството за транспорт и врски е доставено едно барање за изразување интерес. Барањето ќе биде разгледано и ќе биде одлучено во однос на понатамошната реализација на овој проект за што дополнително ќе ја информираме јавноста“, кусо објаснуваат од Министерството. Извори од Министерството откриваат дека очекувале поголем интерес од инвеститорите за проектот и дека на некоја од следните владини седници ќе одлучат што понатаму во однос на проектот. Како што веќе објави Фактор, министерот за транспорт и врски, Миле Јанакиески, веќе и на хартија ги прецизира детаљите за проектот, дополнувајќи го текстот на Правилникот за посебните услови за планирање, проектирање, изградба и реконструкција на аеродром. Како треба да изгледа хидроаеродромот? Измените и дополнувањата на овој Правиилник наложуваат минималната должина на пловниот канал за слетување и полетување на хидроавиони да изнесува 1.500 метри, минималната широчина 150 метри, додека минималната длабочина и најголемата дозволена висина на бранови за пловниот канал за слетување и полетување на хидроавиони се одредени со техничките карактеристики на хидроавионот за кој аеродромот на вода е проектиран. Минималната широчина на основната патека за пловниот канал треба да изнесува 300 метри, а должината треба да е за 150 метри поголема од должината на пловниот канал сметано од двата негови краја. Минималната широчина на каналот кој ги поврзува пловниот канал за слетување и полетување со пристаништето треба да изнесува 45 метри, а широчината на неговата основна патека треба да изнесува 75 метри. Според информациите до кои дојде Фактор, на аеродромот на вода треба да се обезбеди и површина за пристанување и закотвување наменета за прифат и отпрема на хидроавиони, патници, багаж и стока како и за паркирање и одржување на авионите на вода. Површината треба да биде доволна за безбедно пристанување и закотвување на потребниот број на хидроавиони, за да се обезбеди сигурно растојание од најмалку 7,5 метри помеѓу хидроавионите и сите други објекти, пишува во новиот Правилник. Владата за сега не одлучила дали ако го гради хидроаеродромот во Охрид ќе бара тоа да го направи концесионер, проектот ќе се реализира преку јавно - приватно партнерство, со што партнерот ќе биде одговорен за имплементација и реализација на проектот. Реализацијата на целиот проект вклучува финансирање, проектирање, изградба, оперирање и одржување на новиот аеродром на вода.