„Агрокор“ вработува, ама само во Хрватска

Добивај вести на Viber

Хрватскиот конзорциум „Агрокор“ ја повторува акцијата за вработување на млади луѓе под мотото „Со работа излез од криза“, која за првпат ја спроведе во 2011 година. Компанијата на својата интернет страница најавува дека има намера од 21 март да вработи повеќе стотици млади луѓе во своите фирми-ќерки „Конзум“, „Јамница“, „Ледо“, „Звијезда“, „ПИК Врбовец“, „ПИК Винковци“ и други. Се бараат млади со или без работно искуство за различни позиции во одделите за финансии, развој, маркетинг, производство на храна и пијалоци и земјоделско производство. Од сите пријавени кандидати, од магистри, економисти и инжинери до продавачи, месари и шофери, „Агрокор“ во првата селекција на тримесечна работа ќе вработи неколку стотици, стои во соопштението од компанијата. Младите на овој начин добиваат работа и можност да го стекнат потребното работно искуство, а „Агрокор“ и неговите компании добиваат нови работници за реализација на своите амбициозни развојни проекти, во кои само годинава ќе бидат вложени речиси 200 милиони евра, додаваат од конзорциумот. На ист ваков оглас пред три години се пријавиле 15.613 кандидати, од кои 1.000 биле вработени на определено работно време од три месеци. „Агрокор“ е присутен со инвестиции и во Македонија, но конкурсот за вработување се однесува само на Хрватска. Оваа компанија во 2011 година отвори откупно-дистрибутивен центар за овошје и зеленчук во Струмица, инвестиција вредна 20 милиони долари, а имаше намера да влезе и во енергетскиот сектор во земјава. Минатата година, магазинот „Форбс“ го прогласи сопственикот на „Агрокор“ Ивица Тодориќ за најбогат човек на Балканот, со проценето богатство од 581,8 милиони евра.