Албанската полиција уби Грк, за Рама тој е луд

Добивај вести на Viber

Полицијата во Албанија уби Грк, кој пукал на полицајците кои го симнувале грчкото знаме од гробиштата од Втората светска војна во селото Буларат, недалеку од границата.

Убиството иницираше остра реакција од Атина.

Албанските медиуми објавија дека убиениот е Константинос Кацифас (35), кој пукал од калашников во албанските полицајци кои го симнувале знамето.

Албанското село Буларат, претежно населено со Грци, ја одбележувало годишнината од влегувањето на Грција во Втората светска војна, 28 октомври 1940 година, и тогаш се случил инцидентот, пренесе Катимерини.

Албанската полиција тврди дека Кацифас пукал на нив и дека тие возвратиле и го убиле.

Грчкото Министерство за надворешни работи реагираше дека „е неприфатливо операцијата да резултира со загуба на човечки живот“.

„Чекаме од албанските власти целосно објаснување на условите под кои еден грчки државјанин го изгуби животот и веднаш ќе ги преземеме неопходните чекори“, стои во изјавата на грчкото Министерство за надворешни работи. 

Албанското Министерство за надворешни работи се огласи со соопштението во кое „жали поради неоправданата политизација“ на случајот.

Тие наведуваат дека албанската полиција „детално објаснила“ дека е во прашање „целосно изолиран случај“, како и „флагрантен чин“ на агресија против албанската полиција.

Албанското министерство, изјави дека „ги уверува своите соседи дека Албанија е безбедна и мирна земја за сите нејзини граѓани, вклучувајќи ги и Грците“.

Пред амбасадата на Албанија во Атина поради убиството на Гркот, протестираа членовите на крајно десничарската Златна зора, поради што улицата била затворена. Албанските медиуми објавија дека Кацифас бил член на Златна зора, наведе АП.

Кацифас е роден и израснат во Буларт, село оддалечено шест километри од границата со Грција, а од неодамна живеел во Атина.

Во соопштението на албанската полиција се наведува дека Кацифас прво пукал во воздух, а потоа и на полициските возила што му се приближувале.

Албанскиот премиер Еди Рама се чини налева масло на огнот преку твитот, во кој жртвата ја опишува како „луд човек", пренесе Катимерини.

Во пост на Твитер, Рама изјави дека албанската полиција „само ја вршела својата работа“.

„Драги соседи! Наместо да го опишувате како неприфатлив инцидентот во кој е изгубен животот на луд човек кој отвори оган на нашата полиција, која само ја извршуваше својата работа, да му се заблагодариме на Бога дека ниеден невин живот не е изгубен поради екстремистичкото лудило“, напиша Рама на Твитер.