Добивај вести на Viber
Граѓанското здружение „Аман“ засилено со претставници на здружението ЛЕНКА денеска во 12 часот повторно ќе протестира пред зградата на Регулаторната комисија за енергетика.
Овој ќе биде 13 протест на Здружението кое го крева својот глас против поскапувањата. Минатата недела „Аман“ ја започна иницијативата за собирање 10.000 потписи за измена на Законот за енергетика, а како што најавија нивното барање ќе го препратат и до Државната изборна комисија. Инаку, кон протестите ќе се придружи и здружението ЛЕНКА, кое вчера го осуди обидите за спречување на протестите.
„Згрозени сме од бесрамноста на одредени организации и поединци кои се осмелија на најподмолен начин да забранат еден автентичен народен протест, протест за достоинствен живот на секој граѓанин и подобрување на животниот стандард –протест против поскапувањата“, пишува во последното соопштение испратено до медиумите попладнево од страна на движењето на социјална правда ЛЕНКА. Оттаму потенцираат дека слободата на изразување револт против неправдите, слободата на протест е сериозно загрозена, истакнувајки дека најостро ги осудуваат обидите за заплашувања и закани кон активистите на „АМАН“ поради што ја изразуваат подршката во одбрана на една од основните слободи и методи на борба против нееднаквоста – правото на протест. Движењето за социјална правда – ЛЕНКА најавува дека и денес како и досега, ќе присуствува на протестот против поскапувањата, кој овој пат ќе биде исто така и протест за зачувување на правото на протестирање.