Анализа: Алкалоид фундаментално стабилен, Гранит евтино примамлив!

Добивај вести на Viber

Изминатава недела имавме можност да видиме што сработеле дел од котираните компании на берзата во текот на 2012 година. Наредниве денови ќе ги дознаеме и резултатите за останатите компании. Еден генерален заклучок е дека кризата навистина удира по билансите, посебно на некои банки каде се забележува зголемено ниво на отписи, но секако има и џебови на успешно работење кои за жал ги нема во некој голем број. Сега ќе направиме една мини-анализа на две компании (најголеми во нивниот сектор) кои неделава објавија резултати и кои се лидери во својот сектор: ГРАНИТ Како и во светот, така и кај нас градежните компании покажуваат големи осцилации во работењето и во резултатите. Извештајот на најголемиот градежник кај нас е неконсолидиран и во него компанијата бележи 324 милиони денари профит, што е помалку од 2011 година, но повеќе од 2010 година. Самиот факт дека компанијата е профитабилна е добра работа имајќи го во предвид регионалниот колапс на градежните компании. Во основа нашите градежни компании се добри компании во лош сектор. Таквата ситуација се должи во основа на работите кои ги добиваат од државата, која за добро на овие компании треба да остане ликвидна и да може редовно да ги подмирува нивните побарувања. Парарелно градежниците мора да се обидуваат да ги вратат пазарите од надвор и да не се претворат во зависници од државни инвестиции. Како и да  е Гранит е профитабилен, се тргува на неверојатно евтин коефициент цена/заработка од 3,8 и е 70% под неговата книговодствена вредност. Има вкупна пазарна капитализација од 20 милиони евра, на скоро 90 милиони евра приходи. Во билансот на состојба велат дека имаат скоро 4 милиони евра кеш и околу 10 милиони евра краткорочни вложувања (да видиме како се точно распоредени ќе ни треба ревидиран извешта). Е сега Гранит има околу 3 милиони акции и доколку сака да подели на пример по 0,5 евра по акција дивиденда веројатно значително ќе ја качи цената на акцијата и ќе привлече поразновиден тип на инвеститори. Но, имајќи ја предвид досегашната политика на менаџментот ваквата опција веројатно не е на маса оваа година, но можеби еден ден ќе биде. Што се однесува до билансот на состојба, добро е што имаме солиден пад на побарувањата на купувачите, и веројатно за сметка на тоа и на обврските кон добавувачите. Билансот е растеретен донекаде од оваа ставка, што е добро за ликвидноста. Сепак треба да напоменеме дека побарувањата од купувачите се неколкукратно зголемени споредено со претходните години. Што се однесува до кредити, компанијата успеала краткорочните кредити да ги сведе на само 55 милиони долари (четири пати помалку од кешот на располагање), додека долгорочните се намалени (претпоставуваме дека износот од 459 милиони денари е за долгорочни кредити, но во извештајот до берзата е поставен на погрешно место и веројатно треба да се поправи). Во основа како и секаде кај нас и Гранит се мачи со наплатата, но засега успева да балансира и да нема проблеми со кредити и во тековното работење(така барем делува кога го читаме го билансот). Може да заклучиме дека Гранит е навистина евтина акција, која секогаш може да биде поевтина имајќи го предвид опкружувањето, но исто така ова е една од акциите која има потенцијал за раст и од 100%, за разлика од други акции на берзата. Зголемена дивиденда би била добра работа за акцијата. АЛКАЛОИД Една од најстабилните акции на берзата и веројатно со Комерцијална Банка единствени акции кои наликуваат на акции кои се тргуваат на големите берзи. Компанијата редовно и транспарентно објавува извештаи, има широка акционерска структура, дели редовно дивиденди, присутна е во јавноста и можеби еден ден ќе стане дел од некоја голема глобална компанија. Што се однесува до резултатот, факт е дека по подолги години е прекината серија на растови на профитот и тоа баш во време кога луѓето требаше повеќе да ги боли главата (аналгинот инаку е еден од најпродаваните производи на овој за наши услови гигант). Еден посто зголемување на продажбата, некои ситни корекции во долните ставки на билансот на успех предизвика 5% пад на добивката, на компанијата која низ годиниве просечно си растеше со силни 10%. Инвеститорите не се премногу загрижени засега, акцијата се тргува околу книговодствената вредност и на коефициент цена/заработка од околу 11, што е на некој индустриски просек. Што би рекло, доколку некој не го превземе Алкалоид тешко може да очекуваме некои големи скокови на цената нагоре. Но, од друга страна ова е и акција која постојано и по малку им враќа на инвеститорите. И покрај зголемувањето на долгорочните кредити, сепак тие се само малку поголеми од кешот кој го има компанијата, така да не станува збор за нарушување на ликвидноста. Во основа стабилен биланс со силна капитална база, кој гарантира сигурна иднина на компанијата. Алкалоид веројатно ќе продолжи со политиката на исплата на дивиденда околу ланското ниво што би рекле принос од околу 4%, цената се држи исклучително солидно и тоа значи дека има добра база направена веројатно од домашните фондови, додека странците и не излегуваат премногу, а менаџментот постојано си докупува. Значи кој е за сигурна долгорочна иднина Алкалоид е добар избор. Кога сме веќе кај фармацијата да споменеме дека на пример Реплек е фундаментално доста поевтин и дава двојно повеќе дивиденден принос. Сепак, со оглед на помалата ликвидност, веројатно е поголем ризик од  Алкалоид, но веројатно кој е за малку повеќе принос и ризик средствата треба да ги насочи таму. Димитриоски Милан *авторот не поседува акции во наведените компании