Антикорупциска не се откажува од правната битка со Ѓорѓе Иванов

Добивај вести на Viber

Државната комисија за спречување на корупција не се откажува од правната битка со поранешниот претседател на Македонија, Ѓорѓе Иванов, за кого Управниот суд реши дека одлуката на ДКСК за отварање прекршочна постапка за унапредување на генерали пред претседателските избори е донесена без да му овозможи на поранешниот шеф на државата да изложи своја одбрана.

Антикорупционерите најавија дека ќе ја оспорат одлуката пред истиот суд. Од Антикорупциска за 360 Степени велат дека имаат доволно аргументи на своја страна и дека ќе ја обжалат одлуката на Управниот суд, кој според нив не се занимавал со суштината на прекршокот, односно со прецедурата, туку со формата.

- Во оваа судска одлука не се третира дали е правилно или неправилно постапувањето на претстадателот. Тие постапуваат од аспект на формата, односно дали сме требале да го повикаме претседателот како странка во нашата постапка. Таа одлука се однесува на процедурата. Ние сметаме дека сме постапиле правилно и ќе си аргументираме нашиот став во жалбата што ќе ја доставиме до Вишиот управен суд. Случајот не е загубен и се уште е жив. Не е разговарана материјалната страна. Ова се правни тактики, ако можам така да кажам, и ние ќе се бориме, изјави првиот антикорупционер Билјана Ивановска.

Иванов пред претседателските избори го унапреди началникот на генералштабот на АРМ, Васко Ѓурчиновски, во чин генерал-потполковник и изврши промена на три командни генералски места во АРМ.

Дополнително, според Управниот суд, противуставно е да се укине веќе стекнат офицерски или генералски чин.