Антикорупциска: Пријави за 26 судии што прикриле имот

Добивај вести на Viber

Државната комисија за спречување на корупцијата (ДКСК) ги прибира aнкетните листови за имотната состојба на претставниците на судската власт.

Во проверката во 2011 година на овие листови за носителите на јавни функции во законодавната, извршната и судската власт од  ДКСК посочија дека 26 носители на јавни функции во судството дале непотполни податоци во анкетните листови и не пријавиле промена на имотната состојба. ДКСК согласно со своите надлежности од Законот за спречување на корупција јави дека има поведено прекршочни постапки и има поднесено барања за испитување на имотната состојба до Управата за јавни приходи.

Проверка на имотната состојба ДКСК врши и во рамки на конкретни предмети со сомнежи за корупција во кои се посочуваат одделни судии од сите судски инстанци, стои во соопштението на  ДКСК.

Оттаму потенцираат дека секое службено лице,  а тоа значи и секој судија има законска обврска да пријави промена на имотната состојба во рок од 30 дена од настанатата промена, а секое несовпаѓање на пријавената со фактичката состојба е предмет на постапување на Комисијата.

Во наредниот период од Државната комисија за спречување на корупцијата посочуваат дека ќе продолжат со целосните системски и други проверки на анкетните листови поднесени од носители на јавни функции, вклучувајќи ги и судиите.