АрцелорМиттал Скопје со барање до инволвираните страни за поскоро изнаоѓање на решение за завршување на штрајкот на Македонски Железници
Објавено во: Мои пари 02 Март, 2017
По речиси две недели од штрајкот на Македонски Железници кој доведе до целосна блокада на железничкиот транспорт во земјата, од АрцелорМиттал Скопје соопштуваат дека се сериозно погодени од случувањата. Повеќе од 22.000 тони репроматеријал е во транзит кон Скопје, но испораките од Грција и Србија се блокирани од петокот, 17ти февруари. Досега, последици беа регистрирани со доцнење на планираната кампања за производството како и големи трошоци и пенали за лежарина, но доколку штрајкот не прекине веднаш, ќе следува целосен прекин на производството. Загубите ќе влијаат не само на АрцелорМиттал туку и на голем број крајни корисници низ регионот на целиот Балкан кои ќе ги добијат нарачаните ладновалани, пластифицирани и поцинкувани лимови со значителни задоцнувања. Оттука, за компанија која е во голема мера ориентирана на извоз, по повеќе години на успешен раст постои сериозен ризик од негативни последици на пазарот.
Уште од почетокот на штрајкот, АрцелорМиттал е во комуникација со инволвираните страни, вклучувајќи ги МК Железници, Синдикатот и сите надлежни владини институции, од каде биле уверувани дека е неизбежно доаѓањето до решение, но до ден денес нема никаков напредок и сега постои ризик од уште поголеми последици. Од компанијата бараат гаранција за овозможување и најмала услуга од МК Железници.
Додека многу компании целосно се пренасочија кон камионски превоз, АрцелорМиттал е еден од неколкуте преостанати големи индустриски корисници на Македонски Железници, кој овозможува значителни количини, годишен пораст и навремени исплати.
Во секоја демократска држава, штрајкот е правна и неопходна алатка – меѓутоа, ниеден штрајк не треба да влијае на одржливоста на индустрискиот сегмент. Доколку успешни бизниси сносат последици како трети страни, во ваков предизвикувачки пазар целата земја губи конкурентност и на крај тоа е на штета на сите Македонски граѓани.