Аргентина предлага даночна амнестија за инвеститорите со непријавени средства

Добивај вести на Viber

Владата на Аргентина прогласи даночна амнестија за граѓаните кои вложуваат свои непријавени пари во националната економија, пренесоа светските агенции.

Граѓаните кои имаат долари можат да ги легализираат преку купување инфраструктурни обврзници, а добиените средства ќе се искористат за изведување енергетски проекти, соопштија аргентинските власти, цитирани од руските медиуми.

Владата предложи и варијанта да се купуваат сертификати на Централната банка, чии приходи ќе се искористат за изградба.

- Се надеваме дека овие мерки ќе ги убедат луѓето, кои имаат непријавени средства во долари, да ги искористат за инвестиции во „транспарентни“ финансиски инструменти, изјави министерот за економија Ернан Лоренсино.

Мноштво Аргентинци традиционално претпочитаат заштедите да ги чуваат во долари, додека истовремено во земјата е активна забраната за купување на американската валута.

Мноштво експерти, меѓутоа, се скептични кон предлогот на властите.

-Проблемот не е што луѓето не знаат што да прават со доларите, туку што ја избегнуваат националната валута - песото, забележува поранешниот гувернер Родолфо Роси.