АРКТИЧКА ЗИМА НИ ТРОПА НА ВРАТА: Прво снег, па потоа студ!
Објавено во: Македонија 03 Јануари, 2017
Денешното наоблачување и очекуваните слаби локални врнежи од снег, пред се во повисокиот дел од западиот крај, се само мала „увертира“ пред наглата промена на времето која се очекува во втората половина од неделата.
Почнувајќи од четврток, наштето подрачје ќе потпадне под влијание на арктички студена воздушна маса, која во комбинација со широкото циклонско поле кое ќе ја обезбеди потребната атмосферска влага, ќе резултира со снежни врнежи, пренесува метеопро.
Но, овие снежни врнежи ќе бидат проследени и со засилен северен ветер, што ќе значи проблематично одвивање на сообраќајот, како и создавање на снежни намети.Снег ќе има и во петок, повторно проследен со умерен до засилен северен ветер.
Снегот ќе престане заклучно со петок навечер, но викендот има друг „кец во ракавот“. Утрата во сабота и недела ќе бидат прилично студени, а локално минималната вредност ќе се спушти до околу -20°С.Но, треба да се напомене дека ова не се ни од далеку рекордно ниски вредности на температурата во Македонија.
Температурата воопшто нема да ја надмине „нулата“ во текот на петок и сабота, но треба да се напомене дека сабота е денот кој што биде вистински студен со максимална вредност на температурата која ретко каде ќе се „искачи“ над -5°С.Постепено студот ќе „попушта од недела.