Арсовски одговори кога ќе биде отворен Македонски културен центар во Благоевград
Објавено во: Македонија 04 Мај, 2022
Македонскиот културен центар во Благоевград во Бугарија ќе биде отворен до крајот на годината.
Владиниот портпарол Душко Арсовски вели дека неговото име ќе се определи во комуникација со нашиот Институт за национална историја.
„Премиерот Димитар Ковачевски минатата недела најави дека планира да го запознае својот бугарски колега Кирил Петков дека како Влада во текот на оваа година имаме намера да отвориме нов културен центар во Благоевград“, изјави Арсовски.
На прашање до каде се проверките на Владата за легитимноста на постоењето на бугарскиот клуб „Иван Михајлов“ во Битола, Арсовски посочи дека се собираат информации за начинот на кој е регистриран тој клуб. Кажа дека јавноста наскоро ќе биде информирана и за ова прашање.
„Тоа што е важно е дека се разгледуваат повеќе опции и институциите ќе постапат соодветно во овој случај“, додаде Арсовски.
Овој клуб поттикна бројни реакции во јавноста. Граѓаните го доживеаја како провокација, а реакции имаше и од повеќе партии.