АТИНА СЕ ПЛАШИ ОД ДЕСТАБИЛИЗАЦИЈА НА МАКЕДОНИЈА: Што може да изгубат Грците?
Објавено во: Балкан 02 Мај, 2017
Дополнителна нестабилност и граѓански конфликт во Македонија не ѝ оди во прилог на Грција, пренесуваат грчките медиуми, кои деновиве будно ги следат случувањата во државата и на Балканот.
Грчкиот портал „Протагон“ пишува дека на Атина ѝ е потребна стабилна Македонија за да може во одреден момент да се најде соодветно решение за името. Дополнително треба да се одржат економските интереси и соработка кои Грција ги има со македонските бизнис-партнери.
„Протагон“ додава дека дестабилизацијата на Македонија може да доведе до нови притисоци врз Грција за прием на Македонија во НАТО.
„Јасно е дека Атина сака БЈРМ да биде стабилна. Тоа е единствениот начин во некој момент да се реши спорот за името, кое претставува најважниот отворен спор за Грција на Балканот. Нестабилноста може да ги донесе во прв план барањата и притисоците за прием на БЈРМ во НАТО, како начин да се осигура мирот, а тоа ќе предизвика главоболка во Атина со нерешен спор за името“- пишува во анализата.
Според „Протагон“, Грција е загрижена за ситуацијата и поради економските интереси и соработка, како и за спроведувањето на мерките за градење доверба. Во анализата се посочува дека грчката влада треба многу добро да ги пресмета последиците од можен граѓански конфликт во Македонија и како тоа би влијаело на засилување на албанскиот фактор во регионот, уште една тема за која постои загриженост од грчка страна во овој период.
Грција уште вечерта по крвавите инциденти во македонското Собрание испрати апел за смирување на ситуацијата и се понуди, доколку биде побарано од неа, да помогне за намалување на тензијата.
Грчкиот неделник „Реал“ пишува дека премиерот Алексис Ципрас за случувањата во Македонија и на Балканот викендов разговарал со германската канцеларка Ангела Меркел, за време на Самитот на Европската Унија посветен на излегувањето на Велика Британија од Унијата. Тие наводно, се согласиле Грција да преземе иницијативи за стабилизација на регионот.
Од кабинетот на Ципрас велат дека тој за време на состаноците на самитот изразил голема загриженост за ситуацијата во Македонија и кажал дека Грција останува главен столб на стабилност во регионот.