Добивај вести на Viber
Фирмите од Австрија кои инвестираат во Македонија за годинава имаат оптимистички очекувања - подобрување на состојбата во економијата, повисок промет и нови вработувања.
„Би сакал да укажам на една анкета која што ја направивме меѓу фирмите од Австрија кои имаат инвестирано во Македонија и фактите се различни, но може да се констатира дека соработката тече, условите не се едноставни, но може да се каже дека во 2014-та година очекуваат подобрување на состојбата, повисок промет и нови вработувања“, изјави претставникот на Австриската стопанска комора, Герхард Шлатл, на денешната средба со домашни компании во Стопанската комора.
Домашните компании пак очекуваат австриските позитивни искуства да ги доближат до европската регулатива. Австрија е втор најголем инвеститор според директни странски инвестиции во Македонија.
Во последните пет години австриски фирми во земјава вложиле околу 81 милион долари, пред се во енергетскиот сектор, во телекомуникациите, во банкарскиот и финансискиот сектор и во областа на градежништвото. Размената во 2013-та година меѓу Македонија и Австрија изнесува 175 милиони долари, при што е констатиран раст од 4,2 отсто во однос на 2012 година.