Автомат клубовите и казината се „мобилизираат“ против предложениот Закон за игрите на среќа?

Добивај вести на Viber

Новиот Закон за игрите на среќа, кој уште не е изгласан, но треба да се донесе по скратена постапка, ги мобилизира автoмат клубовите и казината во ново коцкарско здружение „Мак Гејминг“.

Најпрфилирана членка е Про-Бетинг Скопје, компанија преку која лани се свртеле 180 милиони евра за обложување, понатаму Тхе-Слотс, тетовската Гаминг Професионал, битолските Клуб Казино 77 и Клуб Слот 77, како и Монополи Консалтинг од Гевгелија. Претставник на здружението е бизнисменот од Тетово, Роберт Пауновски.

„Организирано делување во остварувањето на правата при донесувањето на регулатива од областа на игрите на среќа во казина и автомат клубови“ и „подобрување и унапредување на законските и подзаконските одредби од областа на игрите на среќа“ се едни од наведените цели на работењето на здружението.

Според веќе подготвениот нов Закон за игри на среќа, може да се заклучи дека казината и автомат-клубовите со видеолотариски апарати ќе мора да се одалечат на најмалку 500 метри пат од основните и средни училишта, додека обложувалниците ќе може да останат на своите места. 

Обложувалниците нема да смеат да имаат видеолотариски апарати, освен оние кои се оддалечени на половина километар од училиштата и тоа најмногу пет такви на едно уплатно-исплатно место. Растојанието ќе го мерат геодети на начин пропишан од Агенцијата за катастар на недвижнини, а на барање на приредувачите на игри на среќа.

Покрај „Мак Гејминг“, останати влијателни приредувачи на игри на среќа веќе се групирани како членови на Асоцијацијата на спортски обложувалници на Македонија (АСОМ) и Асоцијацијата на приредувачи на игри на среќа (АПИС) од каде што веќе се изјаснија против овој законски предлог, кој би ја уништил една од, како што велат, најдоброрегулираните економски гранки.

Од Министерството за финансии, кое се јавува како предлагач на овој закон, веќе рекоа дека, со цел заштита на младата популација, како најсоодветно решение одлучиле деловните простории во кои се приредуваат игри на среќа во автомат-клуб, во казино, во обложувалниците во кои има поставено ВЛТ-терминали и деловните простории во кои се приредуваат електронски игри на среќа да ги оддалечат на 500 метри од основни и средни училишта. Овие прилагодувања би траеле две години.

А.К.