Добивај вести на Viber
Групацијата Балкан Енерџи груп сака да ја купи скопска Топлификација дознава Фактор. Според нашите информации, луѓе од оваа групација, по македонските деловни банки се интересирале за финансиската состојба на Топлификација АД Скопје, дали компанијата има долгови, кредити и сл. Засега, нема официјална информација за можната зделка.
Ова не е прв пат во последно време да се пуштаат информации поврзани околу евентуална продажба на Топлификација. Имено, во јули годината, на македонската берза се појави ценовно чуствителна информација во која стоеше: Надзорниот одбор на Топлификација Скопје донесе одлука за формирање мнозински пакет акции во компанијата, заради заштита на интересите на акционерите. Подоцна беше соопштено дека формирањето на таков пакет е прекинато.
Ваквите информации, особено дојдоа до израз откако кипарската фирма „Кордикор инвестментс лимитид“ во почетокот на јуни купи 16,44 отсто од главнината на компанијата. Таа купи 74.000 акции за сума од 3,7 милиони евра, преземајќи го уделот што го продаваше словенечкиот акционер „Потеза“.