„Бехтел и Енка“ отвори канцеларија во Македонија, се чекаат преговорите

Добивај вести на Viber

Конзорциумот Бехтел и Енека на улица Максим Горки во Центар отвора претставништво пред почетокот на преговорите за изградба на коридорите 8 (Делница: Тетово – Гостивар – Букојчани и проектот за автопатот Требеништа – Струга – Ќафасан) и 10 Д (Делница на автопатот Прилеп-Битола), на кои треба да се утврди и сумата која државата треба да му ја плати на контракторот.

Џошуа Т. Бејкер од Велика Британија и Озгел Инал од Турција се назначени за овластени градежни инженери.

Во моментов тече огласот на Јавното претпријатие „Државни патишта“ за надзор и правен трансакциски советник за изградба на коридорите. Краен ропк е 9 март. Според она што не известија од Министерството за транспорт и врски, надзорникот и правниот трансакциски советник ќе членуваат во Комитетот за преговори со Бехтел и Енка. 

Преговорите ќе се одвиваат со околу 120 луѓе за цените, роковите и проектите, не информираат од Министерството за транспорт и врски. Покрај луѓе од „Државни патишта“ и консултантот, ќе има и претставници на асоцијации, комори и други тела. Извештаите со деталите ќе бидат поднесувани во работната група во Владата, од каде што треба да се одлучи дали ќе се прифати понудата на Бехтел и Енка.

Законот за изградба на коридорите 8 и 10 Д, кој овозможува директна зделка односно да нема тендер, беше донесен во Собранието, откако Владата претходно потпиша Меморандум за соработка со американско-турскиот конзорциум „Бехтел и Енка“ за тие целосно да ги проектираат и изградат автопатиштата.

Државната комисија за спречување корупција (ДКСК) истиот го оспори пред Уставниот суд со образложение дека тој ги крши уставните начела за слобода на пазарот, како и начелото дека Републиката ќе преземе мерки против монополска положба.

Меѓутоа, Уставен ја отфрли иницијативата на ДКСК. Првиот вицепремиер Артан Груби, кој сега е дел од владината работна група, одлуката на Уставен ја нарече „вест на годината“ бидејќи сега нема правни пречки да се оствари сонот на граѓаните за автопатско поврзување од Ќафасан со Албанија до Блаце со Косово.