Белград ќе заличи на Дубаи?

Белград како Дубаи. Арапските инвеститори од компанијата Emaar properties од Обединетите Арапски Емирати го претставија новиот проект Белград на вода, во кој ќе вложат околу три милијарди евра. Ексклузивни хотели, најголемиот трговски центар во Србија, културни и спортски објекти на брегот на реката Сава се дел од проектот кој ќе зафаќа 1.5 милиони квадратни метри. Проектот предвидува и кула, како онаа во Дубаи, која ќе се вика „Belgrade tower” и ќе се наоѓа на брегот на реката, каде што се сега железнички пруги во сопственост на Српските железници. Според разговорите што се воделе неодамна, речиси 80 проценти од пругата може да се стави надвор од работа и да се преселат за шест месеци. Целиот проект ќе биде реализиран за пет до седум години, најави сопственикот на компанијата Мухамед ал Алабар, во саботата пред српски владини претставници. Српскиот вицепремиер Александар Вучиќ, кој присуствуваше на презентацијата, оценува дека реализацијата на овој проект, заедно со растот на автомобилската индустрија и земјоделството, ќе значи сигурно излегување на Србија од кризата. Идејата за изградба на Белград на вода е стара четири децении.