БЕСПЛАТНО КОРИСТЕЊЕ НА СКИ ЛИФТОВИ И ЖИЧАРНИЦИ - најава за 15 и 16 декември за Попова Шапка

Добивај вести на Viber

Вечерва официјално ќе се пушти во употреба новото осветлување на патеката за ноќно скијање, на што ќе присуствува и министерот за економија Крешник Бектеши. 

Тој вели дека за Попова Шапка дека сè уште се разгледуваат понудите кои се однесуваат и на јавно-приватно партнерство, но и на целосна приватизација како и друг вид на понуди.

„Ние веќе имаме неколку понуди во однос на Попова Шапка, но не само за Попова Шапка во делот на ски-центрите и развивање на ски-центрите во нашата држава се разгледуваат сите опции, се разгледуваат нивните бизнис планови, нивните понуди, а сериозна Влада, сериозен менаџмент како што е менаџментот на ЕЛЕМ Турс не ги чека само да се заокружи тој процес, но паралелно со тоа инвестира со можностите што ги има се со цел да ја зголеми вредноста на Попова Шапка бидејќи Попова Шапка е на сите граѓани на нашата држава, посебно на граѓаните кои гравитираат во склоп на Полошкиот регион и Општина Тетово“, рече Бектеши.

Ќе се прави идеен проект за жичница од Тетово до Попова Шапка, за кој се предвидени пари во буџетот на ЕЛЕМ Турс за наредната година, најави денеска директорот Адем Авзиу. Тој вели дека се во постојана комуникација со министерот за економија Крешник Бектеши и дека станува збор за огромен проект.

„Јас можам да најавам дека веќе за годишниот план за јавни набавки за 2022 година има предвидено средства околу идејниот проект за жичарницата. Тоа е огромен проект, голема инвестиција за којашто треба и поголеми средства и време за реализација бидејќи не е едноставно, тоа е многу сериозна и обемна работа“, изјави Авзиу.

Според неговата изјава, во наредниот период се очекуваат и понуди за вештачки снег. „За вештачкиот снег имавме претставници на фирма од Италија. Ги очекуваме нивните првични понуди и проценки за воведување на вештачки снег на ски-стазите ’Поток 1‘, ’Поток 2‘ и ’Аеродром‘. Договорени бевме до крајот на месец декември да имаме првичен предлог колку би можело тоа да чини и како би можело тоа да се реализира“, вели Авзиу.

Исто така, од ЕЛЕМ-Турс, најавија неколку новитети кои ќе им овозможат на посетителите поудобен престој на овој наш најголем зимски туристички центар.

„Годинашнава зимска скијачка сезона ја започнуваме на 15 декември. По тој повод, на 15 и 16 декември секој кој ќе дојде на Попова Шапка ќе може бесплатно да ги користи сите ски-лифтови и жичарници. Во изминативе седум месеци, ние на Попова Шапка инвестиравме на неколку главни точки со кои сакаме да ја подобриме инфраструктурата на ски-центарот. Инвестиравме во нова ски патека долга 2 километра, на која ќе може да има и ноќно скијање. Исто така, за прв пат имаме поставено пет јавни тоалети, за што имаше долгогодишна потреба и барање од посетителите. Изградивме и две бачила, објекти каде скијачите можат да се одморат и да се освежат. Паркирањето на возилата, што е еден од најголемите проблеми на Попова Шапка, го ублаживме така што оспособивме уште два паркинзи со што добивме дополнителни 250 до 300 паркинг места. Исто така, планираме во време на викендите кога посетеноста е најголема, а возилата се паркираат и по неколку колометри подалеку, да воведеме бесплатен бус за превоз на посетителите до скијачките терени“, изјави Адем Авзиу, директор на ЕЛЕМ-Турс, пренесе порталот СДК.мк.