Без договор по двочасовните преговори Меркел-Ципрас-Оланд

Добивај вести на Viber

Грчкиот премиер Алексис Ципрас одржа „пријателски и конструктивни“ разговори за долгот со лидерите на Франција и Германија, но нема знаци за договор пред крајниот рок во јуни, соопштуваат светските агенции.

Германската канцеларка Ангела Меркел, францускиот претседател Франсоа Оланд и Ципрас се „фокусираа на желбата да се постигне договор за оваа програма“, за да се поддржат грчките финансии, изјавил еден советник на францускиот претседател.

По речиси двочасовни преговори тројцата „се согласиле за потребата на грчките власти да продолжат да работат со трите институции“, додал изворот, имајќи ја предвид „тројката“ кредитори - ЕУ, Европската централна банка и Меѓународниот монетарен фонд.

Грчки владин извор додаде дека Меркел и Оланд „ја разбираат потребата од долгорочен договор“ и најавиле дека се подготвени „лично да помогнат, доколку е потребно, за да се постигне договор наскоро“.

До 5 јуни Грција треба да плати нова рата на Меѓународниот монетарен фонд. Атина сака кредиторите да им доделат 7,2 милијарди евра по спасувачката програма, но еврозоната инсистира на реформи и програма од страна на грчката влада.

Денес Меркел изјавила дека има уште многу работа пред да се постигне договор со Грција.

„Беше многу пријателски и конструктивен разговор“, изјавила таа пред да започне вториот ден од самитот на ЕУ со земјите од Источното партнерство во Рига.

Но, јасно е дека работата со трите институции треба да продолжи. Треба да се решат многу нешта пред се да се заврши, појаснила канцеларката.

Ципрас од свoја страна изјавил дека е „голем оптимист“.