БГНЕС: Советот на ЕУ ја повика Северна Македонија да ги вклучи Бугарите во својот Устав

Добивај вести на Viber

Советот за општи работи на ЕУ ја повика Северна Македонија да ги заврши уставните измени на кои се обврза во 2022 година, објави БГНЕС.

„Иако Советот го поздравува фактот што новата влада во Северна Македонија ја најави интеграцијата во ЕУ како своја стратешка цел, ние потсетуваме на заклучоците од јули 2022 година и забележуваме дека Северна Македонија сè уште не ги завршила уставните измени на кои се обврза“, се вели во заклучоците објавени денеска во Брисел.

„Повторувајќи го повикот на Европскиот совет до Северна Македонија да го забрза завршувањето на овие амандмани, Советот ја потврдува својата подготвеност да свика уште една меѓувладина конференција, без дополнителни одложувања или дополнителни политички одлуки, што е можно поскоро откако Северна Македонија ќе ја исполни својата обврска во согласност со со своите внатрешни процедури. Советот тогаш е подготвен да го отвори првиот преговарачки кластер што е можно поскоро, во согласност со преговарачката рамка“.

„Советот го поздравува нивото на подготовка на Северна Македонија во клучните области. Се забележува дека сè уште се потребни одржливи и решителни чекори за да се забрза имплементацијата на реформите поврзани со ЕУ, особено во областа на основите и владеењето на правото, каде што е постигнат само ограничен напредок. Советот повторува дека Северна Македонија мора да ја гарантира независноста, професионалноста, ефикасноста и непристрасноста на судскиот систем и да ја реформира јавната администрација“, се наведува во заклучоците.

Министрите за надворешни работи на блокот, исто така, го повикаа Скопје да ги почитува правата на лицата кои припаѓаат на различни малцинства, како и слободата на медиумите и слободата на изразување.

БГНЕС потсетува дека парламентот на Северна Македонија во јуни 2022 година го усвои т.н „Француски предлог“, со кој се обврзува да ги вклучи Бугарите во преамбулата на македонскиот устав за почеток на преговорите со ЕУ.

фото БГНЕС