Битола со нова Стратегија ќе го развива туризмот

Добивај вести на Viber

Битола има голем потенцијал за развој на туризмот и со правилни политики и долгорочна работа може да се развие оваа гранка. Ова го посочија претсавниците на НУ Завод и Музеј - Битола и на Факултетот за туризам и угостителство при Универзитетот „Св.Климент Охридски“кои во соработка со локалната самоуправа денеска ги претставија стратешките цели на Битола за одржлив туристички развој преку новата Стратегија за развој на туризмот. Според деканот на Факултетот за туризам и угостителство Сашо Коруновски, општина Битола е атрактивен град за туристите и во наредниот период се очекуваат зголемен број на посети, но и награди и признанија. „Битола ја посочуваме како еден од позитивните примери за развој на туризмот во Македонија и со сигурност може да се каже дека тоа е општина со најбрз развој на туризмот во државата. Тоа е резултат на правилни политики и долгорочна работа посебно во делот на културниот туризам кој се класифицира во туризам со високи потреби и високи стандарди“, истакна Коруновски. На промотивниот настан во Битола, претставникот на НУ Завод и Музеј, Ирена Ружин потврди дека Стратегијата за развој на туризмот се изработувала подолг период и е втемелена на бројни стручни истражувања. „Во стратешките цели предвидени се подобрувања во туристичката инфраструктура, креирање на нови туристички производи, и други активности. Ефектите од стратешкиот пристап и дејствување во туризмот се потврдуваат со бројки бидејќи според информациите од државниот Завод за статистика во Битола за 20 насто е зголемен бројот на ноќевања, а ако се споредат бројот на ноќевања во 2008 со 2012 година тогаш тој е за 100 насто зголемен, истакна Ружин. Градоначалникот Владимир Талески посочи дека во општината во сите 365 денови има најразлични настани и понуда која ја реализираат националните и локалните институции во градот. „Општина Битола нас не задолжува со својата историја и културното наследство да бидеме внимателни кон сите содржини од сферата на културата“, истакна Талески. Општина Битола со донесувањето на новите детални урбанистички планови овозможи инвестирање и зголемување на сместувачките хотелски капацитети во градот и околината. Во потпелистерското село Нижо Поле со новиот урбанистички план предвидени се можности за градба на 9 хотели, беше потврдено на денешниот промотивен настан во Битола.