БОГАТИ ЗАМЕНИЦИ: Назим Буши има куќа од три милиони евра во Скопје, Агим Нухии имот во Теарце и големи заштеди

Добивај вести на Viber

Новиот заменик министер за внатрешни работи Назим Буши е меѓу побогатите заменици кои ги именуваше Владата. 

Тој има семејна куќа во Скопје вредна дури три милиони евра, иако за воља на встината, во неговиот анкетен лист пишува дека е имот на неговите родители. 

Како што се наведува во Анкетниот лист на Буши, кој го објави Државната комисија за спречување на корупцијата, меѓу другиот недвижен имот, тој ја има и оваа вредна куќа, од 760 метри квадратни, која, како што е наведено, е стекната со наследство. Вреди 184.500.000 денари, или точно три милиони евра. 

Како што е познато, Назим Буши стана заменик министер за внатрешни работи на предлог на ДУИ, а во неговата биографија, меѓу другото, е наведено дека од 2010 до 2017 година е потпретседател на Одборот на директори на Македонски телеком, од 2017 година е главен оперативен директор на компанијата, а од 2018 година е претседател на Одборот на директори на Македонски телеком. 

Покрај вредната куќа на родителите, Назим Буши има и земјиште во Скопје од 800 метри квадратни, исто на родителите, вредно 80 илјади евра.

Од друг имот новиот заменик министер за внатрешни пријавил моторно возило Ауди како имот на деца, како и плата од 50.000 денари за 2020 и 1.230.000 денари за 2019 година, исто на неговите деца.

Назим Буши има и кредит од 180.000 денари.

Неговиот колега, пак, кого всушност го наследи од заменичкото место во МВР, Агим Нухии, а тој отиде да биде заменик во ресорот за правда, има голем имот во тетовското село Теарце. 

И сето тоа е во делот имот на родители. Еве по редослед што има Нухии:

Прво, двор во Теарце од 1.110 метри квадратни, вреден 88 илјади евра, па земјоделско земјиште од 6.000 метри квадратни вредно 15 илјади евра. Нухии, односно неговите родители, поседуваат и куќа во Теарце од 180 метри квадратни, која е проценета на 100 илјади евра, а има и куќа за одмор од две илјади евра.

Нихии поседува и моторни возила од 246 илјади денари, сезонски земјоделски приходи од 90 илјади денари, една плата од 70 илјади денари и друга од 25 илјади денари, хонорари од 50 илјади денари и од 40 илјади денари.

А Нухии како имот на родители пријавил и големи семејни заштеди, и тоа денарска штедана книшка од 800 илјади денари, како и семејна заштеда од 2.371.555, при што не пишува дали станува збор овде за денари, долари или евра.

Н.Н.Ф.