Богов: Грчката должничка криза нема влијание врз банкарскиот систем
Објавено во: Економија 22 Јуни, 2015
„Банкарскиот систем е стабилен и отпорен на грчката должничка криза. Движењето на депозитите во двете домашни банки во грчка сопственост е исто како и кај останатите домашни банки така што и тие во јуни имаат пораст на депозитите. Депозитите се пласирани во македонската економија, поради што нивната сигурност зависи од стабилноста на македонската економија, а не од грчката. Двете банки се одлично капитализирани и со висока ликвидност. Нема апсолутно никаква причина за загриженост“, вели во интервју за Вечер, гувернерот на Народната Банка, Димитар Богов.
Гувернерот истакна дека политиката на стабилен курс на денарот останува и покрај заговорите на девалвација.
„Нема никаква причина за менување на политиката на стабилен курс на денарот во однос на еврото. Таа дава добри резултати. Сите анализи покажуваат дека македонската економија не изгубила од конкурентноста поради стабилниот курс. Треба да биде јасно дека со промена на курсот не се добива конкурентност, туку повисока инфлација и повисоки каматни стапки. Впрочем, не случајно и земји со флуктуирачки курс се обидуваат да го држат колку што може постабилен. Единствен начин за одржливо зголемување на конкурентноста е зголемување на продуктивноста. Тоа се постигнува со подобро корпоративно управување, подобра организација на работењето, квалитетен и образован менаџмент, постојани инвестиции, вложување во обука на вработените, мотивација на вработените. Тоа се темите кои треба да се отворат“, потенцира Богов.
Во врска со македонецот кој во Швајцарија само на една сметка има 54,6 милиони долари, Богов вели дека:
“Кое и да е тоа лице, фокусот треба да ни биде не на тоа колку многу пари има, туку дали се заработени во Македонија или во странство, а ако се заработени во Македонија, тогаш дали се легално заработени, дали е платен соодветен данок, дали се изнесени законски“.
Целото интервју може да го погледнете на овој линк.