Бучковски: Петков се најде во стапица во Битола

Добивај вести на Viber

Поранешниот специјален претставник за односите со Бугарија, Владо Бучковски, во емисијата „Утрински брифинг“ претпладнево рече дека бугарскиот премиер Кирил Петков се нашол во „стапица на бугарските националисти“ при отворањето на клубот „Иван Михајлов“ во Битола.

- Тој според мене се најде во една стапица. Несакајќи да остави, условно речено, националистите да ја водат приказната околу евентуалниот компромис со Македонија, беше изложен на еден притисок и од нашата домашна јавност кај која загуби дел од симпатиите затоа што сите ние верувавме дека неговиот пристап е вистинскиот начин како ние да дојдеме до одржливо решение, вели поранешниот премиер и олеснувач во македонско-бугарскиот спор.

Бучковски смета дека во овој момент и самото бугарско општество не е созреано да прифати одблокирање на евроинтегративниот пат на Македонија и со тоа се врши притисок на прогресивните сили во Бугарија.

- Сега е вистински проблем да изградиме систем, кој засега не функционира, на взаемно уважување, барајќи во такви околности некои точки кои може да не поврзат.- каде би бил тој заеднички содржател, кој во овој момент ние не го гледаме, наведе тој.

Преку онлајн платформата Зум денеска ќе биде претставен нов клуб за бугарско-македонско пријателство. Помеѓу основачите е и Бучковски, а целта е да се извлечат бугарско-македонските односи од „ќорсокакот" во кој моментално се наоѓаат, да се создаде активно граѓанско општество со претставници од двете земји кои ќе работат на зближување врз основа на европските вредности.