Бујар Османи потврди дека сопругата на пратеникот Костовски е вработена во МНР: Ги има потребните квалификации

Добивај вести на Viber

Министерот за надворешни работи Бујар османи во емисијата „Студио 10“ на ТВ24 потврди дека во МНР е вработена сопругата на пратеникот Мартин Костовски како кадар кој доаѓа од администрацијата на Општина Куманово.

- Нема ништо незаконито во вработувањето. Министерството има недостиг на кадар кој ќе се посвети на тешката работа во дипломатија. Нововработените започнуваат со минимална плата и треба години за да напредуваат во кариерата. Тоа е тешка професија, тие се некој вид номади кои цел живот го поминуваат на различни места. Госпоѓата Костовска е преземена од Куманово и сега е на пониска позиција одошто била претходно, рече Османи.

Тој додаде дека Костовска е на постдипломски студии по меѓународна политика во Прага и во нејзиниот случај не станува збор за трговија со влијание. Тој додава дека таа професија бара време за напредување и со оглед дека и критериумите се тешки нема голем интерес за вработување во МНР. Османи вели дека во моментов има оглас за вработување на 16 нови луѓе.