Четири приватни фирми ќе увезуваат ушни маркички за животни

Добивај вести на Viber

Набавка и дистрибуција на ушни маркички за животни од септември ќе вршат четири приватни фирми.

Досега оваа набавка ја правеше само државната Агенција за храна и ветеринарство. Висината на услугите што ги вршат ветеринарните друштва, како и максималната висина на цената на ушните маркички се дефинирани со одлука на Владата. Врз основа на оваа одлука, максималните цени за ушни маркички за говеда изнесуваат 120 денари за чифт, за овци и кози 30 денари, за свињи 20 денари, 500 денари за микрочип согласно ИСО стандардите и 150 денари за издавање идентификациска плочка за пчеларници. Трошоците за набавка на ушни маркички за говеда, овци и кози, и за кучиња се на товар на одгледувачот на животните, додека за свињите, годинава се на товар на Програмата за здравствена заштита на животните. „Врз основа на измените на Законот за идентификацијата и регистрација на животните, Агенцијата за храна и ветеринарство почна со примена на новиот модел за организирање на системот на идентификација и регистрација на домашните животни и милениците. Со него се либерализира работата на ветеринарните друштва и предвидува овластувањена правни лица кои имаат право на набавка и дистрибуција на ушните маркички за идентификација и регистрација на животните. Сите заинтересирани лица за набавка контактите може да ги најдат на нашата веб-страница. Напоменуваме дека постапката на издавање на овластување останува отворена и понатаму, односно сите заинтересирани правни лица може да ја почнат оваа постапка за набавка и дистрибуција на ушни маркички“ велат во Агенцијата за храна, пишува „Дневник“. Оттаму велат дека тие имаат обврска да вршат проверка на квалитетот на ушните маркички пред да издадат одобрение за ставање во промет, повремена контрола на нивниот квалитет, како и мониторинг на работа на доставувачот во врска со исполнување на законските рокови за ставање во промет на ушните маркички и контрола на законски дефинираната резерва ушни маркички која мора да ја има овластениот доставувач. „Новиот пристап во спроведувањето на системот на идентификација и регистрација на животните овозможува поголема флексибилност, ефикасност и зајакната конкуренција помеѓу ветеринарните друштва, но и поголема покриеност на теренот и поквалитетна услуга кон одгледувачите на животни во поглед на спроведување на системот за идентификација и регистрација“ - објаснуваат во Агенцијата, објави „Дневник“.