Дали Илир Мета ќе поддржи промена на граници?
Објавено во: Балкан 26 Октомври, 2018
Предлогот за промена на границите меѓу Косово и Србија троши многу енергија за погрешни цели.
Ова е ставот на албанскиот претседател Илир Мета. Тој додава дека дијалогот меѓу Косово и Србија, со посредство на ЕУ, влегува во својата завршна фаза.
„Според моето мислење, треба само заеднички американски и еворпски напори за да се донесе до крајот оваа работа која се уште не е завршена, или оваа важна фаза на консолидација на Балканот. Последниот предлог за нова дебата околу тоа што треба да содржи конечниот договор за нормализирање на односите меѓу Косово и Србија, троши многу енергија за погрешни цели. Тој ниту го консолидира ниту го смирува Балканот“, вели Мета.
Според Мета оваа дебата се развива со жесток провокативен јазик.
„Видовме во последниве неколку недели, политичка реторика се одвива со жесток провокативен јазик, воскреснувајќи ја „носталгија“ на страотниот режим на геноцид. Не може да има поголема директна закана од оваа за нашата безбедност“, вели Мета.
Тој уште од почетокот се изјасни против оваа идеја, оценувајќи дека тоа носи нови конфликти и дека на Балканот доста му е од крвополевања.
Оваа идеја ја разгледуваат косовски и српски политичари.
Со таа корекција на граници Прешево, Медвеѓа и Бујановац, Косово сака да ги спои со својата територија, а Србија да го земе северот на Косово населен со Срби.