Дали Македонија развива електронска економија?

Добивај вести на Viber

Според електронска економија, Македонија е рангирана на 37 место од 65 земји во светот, на ранг-листата изготвена од „Бостон консалтинг груп“. Министерот за информатичко општество и администрација Иво Ивановски вели дека интернетот и информатичките технологии се повеќе се користат во бизнисот. „Глобалната компјутерска мрежа, како и развојот на широкопојасниот интернет го поттикнуваат понатамошното ширење на глобалниот пазар, создавајќи една нова економија. Нема да биде погрешно доколку кажеме и дека интернетот денес претставува основа за креирање на еден економски поредок во светот, кој настана како резултат на примената на компјутерските, телекомуникациските и мултимедијалните технологии“, вели Ивановски. Според него, рангирањето ја става Македонија во групата земји со мал коефициент на е-фрикција или пречки за развој на Е-Македонија, а од четирите подгрупи според кои е извршено оценувањето, Македонија најдобро котира според инфраструктурата - на 27-мо место. Електронска економија и современ маркетинг се тема на конференцијата за која Ивановски очекува да им помогне на сите компании на македонскиот пазар. Предавања на конференцијата одржаа директорот за развој во Google Adriatic, Дарко Дујиќ, на тема „Можностите и трендовите во сферата на интернет маркетинг“, потоа стратегот за Google Adwords во Google, Давид Гојо, како и меѓународниот проект менаџер во Goclick, Словенија, Лука Нахбар Цвикел.