Дали Талески од домашен притвор го кроеше ребалансот на општинскиот буџет?

Добивај вести на Viber

Советниците од опозицијата во општина Битола прашаа дали градоначалникот Владимир Талески од куќен притвор го кроел ребалансот на буџетот. 

Советничката во Советот на Општна Битола од ВМРО-Народна партија, Габриела Илиевска, вчера од говорницата му порача на градоначалникот дека го чека нов притвор и дека тесна ќе му биде улицата Широка, алудирајќи на единственото појавување на битолскиот градоначалник по излегувањето од притвор, токму на асфалтирањето на оваа улица. Вели дека сè што е напишано во ребалансот нема врска со реалноста. 

„Еден капитален прокет не е направен, ниту стадион, ниту затворен базен, ниту фонтана, ниту асфалтирани улици. Талески е најголемиот срам за Битола и не можам да сфатам зошто од петни жили го браните. За жал, Битола ќе биде запаметена како град што имал само еден капитален прокет, а тоа е притворот на Талески“ – рече Илиевска.

На овие обвинувања одговорија советниците од власта.

„Храброст е, а и не е храброст, туку лудост, она што е видливо да се оспорува, да се негира или, како што народот рекол, да се прави при очи слеп. Ете, токму тоа денеска опозицијата се обидува да го направи. Резултатите се видливи“ – кажа советничката на ВМРО-ДПМНЕ, Виолета Ковачевиќ.

Советниците од опозицијата инсистираа Талески  да дојде на седница и да каже како ги трошел и како мисли да ги дотроши народните пари.

Советниците од власта се правдаа дека буџетот е развоен со зголемена ставка за капитални проекти. Игор Хаџиевски од ВМРО-ДПМНЕ вели дека стадионот ќе почне да се гради, а се обезбедувале и средства за спортските клубови. Тие политичките опоненти ги нападнаа за двојазичноста која ја споменува лидерот на СДСМ, Зоран Заев.