Даночна тајна е како УЈП го наплатува данокот од најголемиот должник ТЕ-ТО

Добивај вести на Viber

Должат милиони за даноци и придонеси, но не се знае како државата се обидува да им ги наплати парите на фирмите и граѓаните кои не плаќаат. Управата за јавни приходи како даночна тајна ги третира активностите што ги превзема кон фирмите должници. Оттаму не откриваат со кои конкретни мерки се обиделе да ги наплатат парите од моментно најголемиот должник во државата – гасната централа ТЕ-ТО. Фирмата против која се поднесени кривични пријави од финансиската полиција до Јавното обвинителство за лажен стечај и дејства со кои се испрани пари моментно на УЈП и должи 998 милиони денари и е прва компанија на листата должници.

Фактор праша како ќе и се наплатат парите со оглед на тоа што за фирмата има и истрага и пријави и што конкретно сега се планира, но од УЈП велат дека тоа е тајна.

„Согласно член 9 од Законот за даночна постапка, бараните информации и податоци чиешто доставување може да има штетни последици и може да претставува повреда на доверливоста на постапката, не се предмет на комуникација со јавноста и имаат третман на даночна тајна, освен објавените податоци  на веб страницата на Управата за јавни приходи во Листа на должници на доспеани и неплатени долгови по основ на данок на додадена вредност, данок на добивка, персонален данок на доход, придонеси од задолжително социјално осигурување како и акцизи и царини, стои во одговорот од УЈП.

На листата на УЈП ТЕ-ТО не е единствен должник, туку има околу 2.000 фирми и уште 2.500 граѓани. Сите тие должат над десет милијарди денари. Сепак повеќето се долгогодишни должници, а некои од нив се и пропаднати фирми и фирми во стечај.

За моментно најголемиот должник ТЕ-ТО, во јуни годинава Управата за Финансиска полиција поднесе пријави за сомнеж за лажен стечај, злупотреба на службена положба и овластување, но и перење пари во Македонија од трансакции за кои во Русија се водат истраги за криминал. Сомнежите се дека станува збор за испрани над седум милијарди денари или над 100 милиони евра.