Демант од ФЕНИ: Нема никаква тужба од Урбан Инвест

Добивај вести на Viber

ФЕНИ Индустри до овој момент воопшто нема добиено никаква тужба од Урбан Инвест преку Основниот Суд во Велес, а се разбира неможе да изгуби на суд случај кој не постои. Не сме изненадени што одвреме навреме индивидуалци а, еве и помали компании, со дезинформации се обидуваат да извршат притисок врз ФЕНИ за остварување на лични бизнис интереси и задни намери, иако секако не успеваат во тоа. Интересно е што Урбан Инвест е во соседството на ФЕНИ веќе со години наназад и сé додека Урбан Инвест му продаваше варовник на ФЕНИ, немаше никакви поплаки. Откако пред неколку месеци Урбан Инвест си го продаде каменоломот, одеднаш ФЕНИ почна да им пречи и загадува. Впрочем нивната наводна тужба е неоснована колку што е неосновано да се тужи целото население во Кавадарци зашто постојано наносуваат земја на патиштата со своите трактори, од лозјата што ги одгледуваат. Она што изненадува во целата оваа фабрикувана приказна е што оние медиуми што ја пренесоа оваа шпекулација, истото го сторија крајно непрофесионално, односно ниту ја проверија вистинитоста на истата (намерно или ненамерно), ниту се обидоа да стапат во контакт со ФЕНИ, за да добијат став од другата страна, што е всушност основно начело на професионалното известување. Вистината е само една, а тоа е дека ФЕНИ е една од најдобрите компании во Македонија, во секој поглед, вклучително и кога станува збор за грижа за животната средина. ФЕНИ ја доби првата А-Еколошка дозвола во државата, има ИСО сертификат 14001 за управување со животната средина, има инвестирано повеќе од 12 милиони евра во еколошки проекти, а има добиено и награди и признанија, токму за својата посветеност за заштита на животната средина. И секако како и досега така и во иднина ФЕНИ нема да подлегне на вакви нелегални притисоци а, ќе ги превземе сите законски мерки за заштита на својот углед.