ЕЛЕМ и Балкан Енерџи во конкуренција за топланите, Топлификација само дистрибутер?

Добивај вести на Viber

Денес Регулаторната комисија за енергетика  треба да ги објави имињата на компаниите кои конкурирале за производство, дистрибуција и снабдување со топлинска енергија. Минатата недела Фактор неофицијално објави дека за сите три услуги се има пријавено ЕЛЕМ, чија компанија ќерка „ЕЛЕМ-Енергетика“ веќе снабдува со топлинска енергија околу 2.200 станови во Скопје. Во конкуренција е за производство на топлинска енергија е и  руската компанија „Балкан Енергџи Груп“, која е мнозински сопственик на новата топлана ТЕ-ТО, а минатата недела, исто така, и „Топлификација“ извести дека не се откажува и се пријавила , но само за дистрибуција на топлинска енергија, додавајќи дека не ги исполнува условите да конкурира и за производство заради недостиг на капитал. Огласот на РКЕ доаѓа откако „Топлификација“ ги врати лиценците за производство, дистрибуција и снабдување со топлинска енергија, тврдејќи дека не може да ги врши овие услуги со оглед на тоа што РКЕ не дозволува повисоки цени на парното во согласност со трошоците што компанијата ги има за купување на енергенсите – природниот гас и мазутот. „Топлификација“ за ова поднесе и тужба против РКЕ, како што тоа го направи и пред 5 години, но тогаш го изгуби спорот.