Денеска и утре порано започнува полицискиот час
Објавено во: Македонија, Корона Вирус 28 Март, 2020
Денеска и утре забраната за движење ќе започнува во 16:00 часот и ќе трае до 05:00 часот, согласно одлуката на Владата за забрана на движење за време на викендите, наместо во 21.00 часот како во работните денови од седмицата.
Сите јавни установи и приватни компании што работат за време на викенд, треба да се прилагодат на новите ограничувања за движење и да го завршат работниот процес најдоцна до 15:00 часот.
Изземени се единствено земјоделците што одгледуваат раноградинарски култури и имаат неодложни активности поврзани со производство во пластеници. Другите земјоделци ако имаат неодложни активности треба телефонски да се јават во подрачните единици на Министерството за дозвола.
Производствените погони и фабрики го продолжуваат своето производство организирано во смени, додека работниците во време наполицискиот час ќе може да се упатуваат на своите работни места исклучиво со посебни дозволи за вршење сменска и ноќна работа.