Десет сообраќајки вчера во Скопје, повредени осум лица

Добивај вести на Viber

Вчера на подрачјето на СВР Скопје се регистрирани 10 сообраќајки.Осум лица се повредени во пет сообраќајки, а во останатите  пет била причинета материјална штета.

Според информациите од МВР, сообраќајната полиција во текот на изминатото деноноќие открила и санкционирала поголем број прекршоци. Осум возачи се движеле со брзина поголема од дозволената, петмина поминале на крстосница на црвено светло, исто толку не дале првенство на минување на пешаци на обележан пешачки премин, тројца се санкционирани за неправилно престројување, четворица за неправилно престигнување и тројца возачи кои не дале првенство на минување на возилата во зона на крстосница.

Од сообраќај биле исклучени шест возачи кои го управувале возилото под дејство на алкохол, 17 возачи пред да се стекнат со право на управување на моторно возило и тројца возачи почетници, како и 16 нерегистрирани возила..

Во вчерашниот ден вкупно  90 возила се затекнати непрописно паркирани, а со специјалното возило пајак, отстранети биле 74 возила.

Денеска во рамки на сообраќајно воспитниот проект „Да ги заштитиме децата во сообраќајот“, одделението за превенција при СВР Скопје ќе реализира едукативна работилница со учениците од четврто одделение во ООУ „Христијан Т. Карпош“ кое се наоѓа на подрачјето на општина Карпош.