Дескоска: Министерството во 2019 не дало одобрение за употреба на името Иван Михајлов

Добивај вести на Viber

Овие неколку денови слушаме остри реакции околу името на културниот центар Иван Михајлов. Јавноста со право реагира, вели екс министерката за правда, Рената Дескоска. 

„Се постави и прашањето околу тоа кој државен орган дозволил да се регистрира здружение под тоа име. Надлежен за регистрирање на здруженијата е Централен регистар. Доколку во името на здружението е внесено име и презиме на историска и друга позната личност, се бара нејзина согласност, ако е почината – согласност од нејзини сродници до трет степен во права линија, а доколку такви не постојат, согласност дава Министерството за правда“, пишува Дескоска на Фејсбук.

Додава дека во 2019 година кога е регистрирано ова здружение, побарано е одобрение од Министерството за правда. 

„Министерството тогаш не дало одобрение за употреба на името Иван Михајлов. Министерството за правда го известило и подносителот на барањето дека не може да даде согласност за употреба на името Иван Михајлов. Известувањето дека не може да се даде согласност, значи дека немате согласност од надлежниот орган! Овој случај покажува дека треба веднаш да почне постапка за носење измени на законот за здруженија и фондации во кои ќе се пропише јасна постапка за регистрирање на истите, јасни критериуми кои имиња би биле забранети за употреба и да се предвиди компетентна комисија која ќе оцени дали одредено лице е историска личност и да дава предлог за одобрување или не одобрување на употреба неговото име“, се вели во нејзината објава.

Бугарски политичари го отворија културниот центар во Битола викендов. Сепак, тие не одговорија на новинарите дали вакви центри и кога ќе отворат за Македоцните во Бугарија, туку го негираа постоењето на македонското малцинство во Бугарија. Реагираа повеќе партии и бараа реципроцитет од источниот сосед.