ДЕСТИНАЦИЈА БЕЗ КОРОНА: Каква туристичка сезона очекува Дојран?

Добивај вести на Viber

Дојран е град без заразени со коронавирусот, а од локалната самоуправа очекуваат дека оваа година ќе имаат повеќе странски и домашни гости, и дека ќе се вратат на нивото кое го имаа пред пандемијата.

Плус за оваа дестинација е тоа што немаат активни случаи, со што туристите можат да бидат безбедни. Дојран летово ќе понуди збогатена туристичка понуда за гостите, во делот уредување на постоечки плажи, отварање на нови песочни плажи, реконструкција на локални улици.

„Дел од понудата се однесува на: партерно и хортикултурно уредување на зелената рекреативна зона - градски парк централно градско подрачје  со финансиска поддршка од Европската Унија и државата преку Проектот за локална и регионална конкурентност, нови детски паркови, игралиште  за миленици, паркови и зеленила. Согласно Планот за управување и Годишната програма за заштита на природата на Дојранското Езеро – набавивме сувоземно-пловен багер – „Амфибија“ за собирање на пластичен и зелен отпад (бујна вегетација) во Зоната на одржливо користење на Дојранско Езеро, и ова финансиски е овозможено од Европската Унија во рамки на Проектот Интегриран систем на управување со екосистемот на Дојранското Езеро. За прв пат во нашата држава е набавено вакво возило ,,Амфибија" - багер на вода, кое ќе служи за подобрување на квалитетот на водата во езерото. Последните Извештаи од тестирањето на здравствената безбедност на водата во Дојранското Езеро е во одлична состојба и истата може да се користи за капење и рекреација. Најстара плажа ,,Калдрма" се враќа во стариот и препознатлив сјај, а има и реконструкција на Саат кулата, турската бања  и изградба на пристапни патеки до нив“, вели Милка Ајцева, виш соработник во Одделението за угостителство и туризам и локален економски развој во Општина Дојран.

Просечниот престој на гостите во градот е околу 5 дена, а во летото 2018 година во Дојран имало околу 67.200 туристи кои оствариле 336.000 ноќевања. Во 2019 година  имало 61.200 гости кои оствариле 306.000 ноќевања, а во 2020 година вкупно имало 35.280 туристи кои реализирале 176.400  ноќевања.

Најголем дел од леглата се во приватните сместувачки капацитети. Тие имаат повеќе од 5.000 легла, а заедно со одмаралиштата и комерцијалните објекти бројката надминува некаде над 6.000 легла, односно со полн капацитет за 30 дена може да се овозможат 180.000 ноќевања.

На пат кон Грција, многу српски туристи го посетуваат Дојран, а оваа година за нив ќе има попусти во рестораните и хотелите во Дојран, како и бесплатен паркинг поради донираните вакцини.

Во Дојран досега имаше  вкупно 132 случаи на коронавирусот.  Охрид сега има 54, а Струга 22 активни случаи на коронавирусот.

фото Википедија