Добивај вести на Viber
Поквалитетен сигнал, зголемен број телевизиски програми од сегашните 49 на 400, повеќе фрекфенции и дополнителни сервиси, треба да овозможи процесот на дигитализација во Македонија, беше посочено на денешната дебата која ги собра на иста маса сите засегнати во процесот.
Според плановите, овие придобивки треба да бидат достапни од 1 јуни следната година за сите македонски граѓани кои ќе ја следат телевизиската програма преку дигитален сигнал.
Компанијата ОНЕ е избрана за оператор, а Советот за радиодифузија (СРД) наскоро треба да усвои план за намена и распределба на радиофрекфенции на дигиталниот терестријален мултиплекс, додека Агенсијата за електронски комуникации (АЕК) ќе биде регулатор, односно ќе ја утврдува оправданоста на цената што ќе ја нуди ОНЕ. Операторот веќе исплати 300.000 евра за дозволата за оперирање, а со милион евра гарантира дека ќе постави мрежа и опрема за дигитализацијата.
Според Министерот за информатичко општество и администрација Иво Ивановски, ОНЕ има обврска сигналот на телевизиите да го емитува или во стандарден формат или со висока дефиниција на формат, а со тоа граѓаните ќе имаат ист квалитет на сигналот како тие во Европската унија.
Како што изјави претседателот на СРД Зоран Трајчевски, веќе е изработен нацрт планот за намена и распределба на радиофрекфенции на дигиталниот терестријален мултиплекс, што СРД треба да го уссвои наскоро како стратешки документ за спроведување на дигитализацијата.
Тој исто така посочи дека СРД е отворени за да им помогне на медиумите во преминот од аналогно кон дигитално емитување.
Краен рок за исклучување на аналогното емитување на телевизиските содржини во Европа е 2015 година.