Димковски: Поднесена пријава за проневерени 600.000 евра за набавка на софтвер

Добивај вести на Viber

Трајан Димковски, претседател на Комисија за земјодество, шумарство и водостопанство и поранешен министер за земјоделство денеска објави дека е поднесена пријава до Обвинителството за проневерени средства од ЕУ за набавка на софтвер.

„Станува збор за проект од 2015 година вреден 660.000 евра за софтвер во Министерството за земјоделство, шумарство и водостопанство. Во тој период министер во ресорното министерство е Михаил Цветков, а премиер на таа Влада преводена од ДПМНЕ е Никола Груевски. Во таа Влада советник за енергетика бил сегашниот шеф на ДПМНЕ, Христијан Мицкоски. ДПМНЕ и поединци од таа партија, освен што краделе од граѓаните, правеле проневери и со пари од европски фондови“, обвини Димковски.

Тој рече дека пријавата е во контекст на Европската канцеларија за борба против измама (ОЛАФ) која констатирала неправилности и сега препорачува државата да ги врати парите.

„Актуелното раководство на Министерството за земјоделство до надлежното обвинителство достави конкретен предмет со конкретни правни дејства.

Апелираме Обвинителството за гонење организиран криминал да постапи по овој случај и низ законска, судска постапка да бидат санкционирани сите за кои ќе се докаже дека се виновни, а потоа и парите да бидат вратени.

Овој случај на криминал освен што го има оштетено државниот Буџет, фрла дамка и врз репутацијата на нашата држава, која последниве години е лидер во регионот во искористеност на средствата од ИПАРД Програмите“, дополни Димковски.