МИЦКОСКИ ТВРДИ ДЕКА СЛУЖБИТЕ ГО СЛЕДЕЛЕ НЕГО И НЕГОВОТО СЕМЕЈСТВО: Објасни која е причината

Добивај вести на Viber

Премиерот Христијан Мицкоски денеска во Собранието кажа дека службите го следеле додека беше лидер на опозицијата. 

Повикувајќи се на извештај за работата на АНБ, премиерот кажа дека претходните раководства на службите го означиле како организатор на „параполициско-воено-вооружена формација“ што било основ за негово следење.

Мицкоски тврди дека една од неколкуте институции коишто треба да се занимаваат со безбедноста на државата, наместо да се занимава со безбедноста на Македонија, се занимавала со физичко следење на претседателот на најголемата опозициска партија. 

„И тоа го правеле на многу интересен начин. Како? Измислуваат извор во случајот „цилиндар“ кој што според нив доставува веродостојна информација. Конкретно таква информација доставил од објективни причини, нема да ја кажам точната дата, туку ќе кажам некаде од почетокот на 2020 година, чудно тоа коинцидира со изборите кои што тогаш се случуваат, во која што вели, внимавајте, параполициско-воено-вооружена формација. Претпоставувам најголем дел од вас биле параполициско-воено-вооружена формација составена од внимавајте го ова, македонски радикални екстремни и националистички настроени државјани кои имаа за цел во предизборието да вршат заплашување и закани на македонски граѓани за да издејствуваат поддршка за ВМРО-ДПМНЕ. И ова е многу интересно, нарачател и финансиер на оваа пара полициско воено вооружена формација на македонски радикални екстремни и националистички настроени елементи, е професор д-р Христијан Мицкоски“, додаде премиерот. 

Мицкоски најави одговорност за сторителите. Лут е затоа што службите го следеле и неговото семејство.