ДИРЕКТОРОТ ДРАГОЉУБ АРСОВСКИ КУПИ 1.000 АКЦИИ ОД ТТК БАНКА - еве кои се другите сопственички промени
Објавено во: Финансии 09 Март, 2023
Првиот човек на ТТК Банка, Драгољуб Арсовски, купил 1.000 акции од банката со која раководи долги години, а повеќе од него акции, односно 1.500, купила членката на Управниот одбор на банката, Наталија Алексова.
За ова извести самата банка преку Македонската берза до инвеститорската јвност.
„ТТК Банка АД Скопје известува дека проф. д-р. Драгољуб Арсовски, Претседател на Управниот одбор на Банката, се стекна со 1.000 обични акции, издадени од ТТК Банка АД Скопје. Едновремено, известуваме дека Наталија Алексова, Член на Управниот одбор на Банката, се стекна со 1.500 обични акции, издадени од ТТК Банка АД Скопје“, се вели во известувањето од банката.
Кога раководни лица купуваат акции на одредена компанија или банка, тоа значи дека тие имаат доверба во нејзиното работење, а тоа е и патоказ за инвеститорите дека менаџментот верува во бизнисот со кој управува.
Инаку, доминантен сопственик на ТТК Банка е тетовскиот комбинат Тетекс, кој поседува 41,53 отсто од акциите на ТТК Банка, и всушност ТТК Банка е главната „златна кокошка“ во работењето на Тетекс, која носи значаен дел од приходите и од профитот на некогашниот текстилен гигант, кој, пак, се откажа од оваа долги години основна дејност.
Н.Н.Ф.