ДОЦНИ ДОСТАВАТА НА ПОШТЕНСКИ ПРАТКИ: Поштарите најчесто разнесуваат пеш

Добивај вести на Viber

Не секој поштар во внатрешноста на Македонија има на располагање возило за разнесување на пратки.

Ова добро го знаат луѓето кои живеат во руралните места во земјата. За нив е важно да ги добиваат пратките навреме, исто како и оние граѓани кои се во урбани средини.

„Ако знам дека треба да добијам некоја пратка, тогаш јас се јавувам во поштата во соседното село, и одам да си ја земам, затоа што возило поштарот нема. Последен пат ми рече дека три пати во месецот добива возило, но едноставно некои пратки не може да чекаат. Не можам јас да чекам кога ќе стигнат пензии, па тогаш да земам документ кој е неопходно веднаш да се достави во одредена институција“, вели жена од кумановско село.

Доставата на пратки на доставните подрачја на територијата на Република Македонија, поштарите ја извршуваат пеш, со велосипед, мотор или моторно возило во зависност од конфигурација на терен  и параметар поминат пат кој важи за рамничарски терен, велат од Македонски пошти.

На рамничарски терен доставата се врши пеш, со велосипед или мопед, а на ридско-планински места со мопед.

„При тоа, во рамки на рамничарските терени покрај параметарот конфигурација на терен во предвид се зема и параметарот-поминат пат. Достава со моторни возила е предвидена за посебни категории на пратки, односно за пакетските пратки до 10 кг, бизнис пратки и бизнис пакети и пратките на брза пошта ЕМС. Воедно, друштвото редовно согласно потребите врши обновување на возниот парк, последна набавка на мопеди е извршена во 2016 година, а на велосипеди започната кон крајот на 2018 година, но истата не е реализирана заради проблеми со постапката на јавна набавка. За 2019 година се предвидува обновување на возниот парк на друштвото со моторни возила, мопеди и велосипеди, во интерес на обезбедување на поквалитетна достава“, велат од Македонски пошти.

Досега имало критики дека пратки се губат или стигнуваат со задоцнување на посакуваната адреса.