ДОДЕКА СЕ БАРА УКИНУВАЊЕ: Синдикатот на УПОЗ побара К-15 да важи и за јавниот сектор!

Добивај вести на Viber

Исплатата на регресот за годишен одмор не смее да се прекине, порачуваат членовите на Синдикатот на работниците од Управата, Правосудните органи и Здруженијата на граѓани на Република Македонија (УПОЗ). Од УПОЗ велат дека и јавниот сектор треба да го потпише Општиот колективен договор за исплата на регресот К15, за да биде во рамноправна положба  со приватниот сектор. -Ние сме против укинување на исплатата на регресот за годишен одмор К15, тоа е право на работникот. Но сметаме дека приватниот и јавниот сектор треба да бидат рамноправни. Тоа значи дека регресот треба да се исплаќа и во јавниот сектор. Во интерес на работниците е потпишување Општ колективен договор и за јавниот сектор и враќање на регресот за годишен одмор што се исплаќаше до 2005 година - вели за Фактор претседателот на УПОЗ, Пецо Груевски. Против укинувањето на исплатата на регресот и изнаоѓањето на други модели за исплата се огласија и потписниците на Синдикалната повелба, на која се потпишани неколку синдикати и граѓански здруженија. -Потписниците на Синдикалната повелба најостро реагираат против ова најново поткусурување на правата на работниците и им порачуваат на работодавачите, за финансиските потешкотии со кои се соочуваат, да се обратат до владата која ги генерираше лошите услови за стопанисување, а не, како по навика, да им ги кратат правата на работниците, чиј труд, за жал, најчесто се користи за збогатување. Работниците не смеат да бидат инстанца во стопанските процеси врз чиј грб ќе се амортизираат финансиските проблеми на деловните активности на секој кој се одлучил да стопанисува. Општеството чиј конституент сме сите граѓани, воедно и работници, очекува и од организациите на работодавачи и од синдикатите кои сакаат да се легитимираат како репрезентативни, да ја преземат одговорноста на квалификацијата социјални партнери и, наместо на намалување на работничките права, конечно да почнат навистина да работат на нивно зголемување, се наведува во соопштението на Синдикалната повелба. И од Синдикалната повелба бараат да се дискутира за проширување на правото на регрес за годишен одмор за тоа да важи и за вработените во јавниот сектор. Укажуваат дека укинувањето на задолжителната исплата на регрес за годишен одмор ќе значи сериозно намалување на работничките права. На вчерашниот состанок помеѓу Организацијата на работодавачи и Сојузот на синдикатите беше договорено да продолжат со разговори за да се утврдат модалитетите, начинот и висината за исплата на регрес за годишен одмор. -Од страна на социјалните партнери беа презентирани ставовите за повеќе прашања од кои и за регресот за годишниот одмор. Ставовите беа насочени кон прашањата за начинот и висината на исплатата на регресот за годишен одмор врз основа на анализата која ја презентираа социјалните партнери. Социјалните партнери се договорија и натаму да продолжат разговорите со цел да се утврдат модалитетите, начинот и висината за исплата на регрес за годишен одмор, стои во соопштението на Организацијата на работодавачи. Укинување на исплатата на К15 првично побараа од Организацијата на работодавачи, кои посочија дека за ваквиот предлог  добиле позитивно мислење и од  синдикатот. По нив укинување на исплатата на К15 побараа и стопанските комори, кои пак посочија дека за да ја запазат законската обврска биле принудени да земаат и кредити. Бизнисмените посочија дека сега кога земјава се наоѓа во политичка криза за нив е невозможно да се наметнува обврска за исплата која за фирмите значи дополнителен трошок. Обврската за исплата на годишен регрес за одмор беше укината во 2005 година и по девет години, со последните измени на Општиот колективен договор за приватниот сектор потпишан помеѓу ССМ и Организацијата на работодавачи, обврската за исплата повторно се воведе лани, и е со важност од само две години, што значи дека  по 2015 година, мерката ќе престане да важи, доколку не се направат нови измени. Т.С