Доделени наградите 11 октомври - кои се добитниците?

Добивај вести на Viber

По повод 75 годишнината од Денот на националното востание, во Собранието денеска беа доделени наградите 11 октомври. 

Ликовниот уметник Благоја Маневски, писателот Раим Канији, пијанистката Елена Мисиркова и  актерот Атиља Клинче  оваа година Собранието ги прогласи за најзаслужни во областа на науката и уметноста. Тие ја добија наградата 11 октомври за животно дело во областа на културата и уметноста за 2016 година. 

Свое обраќање имаше и академикот Митко Маџунков кој порача дека нацијата е поделена. 

„За да бидеш, треба јасно да знаеш што си бил, што си и што бараш од својата иднина. Државата е основниот предуслов за нашиот опстанок. Додека имаме држава, без оглед на тоа кој и како ја води, имаме и надеж дека нашата физичка и духовна супстанција ќе се сочува. Без држава, првиот удар ќе биде врз она најважното – јазикот со се што е создадено на него… Денот што го славиме денеска е симболот на нашите заеднички стремежи, без оглед на сиот тек на околности“ - рече тој. 

Пред присутните говореше и  Мисиркова. 

„Сепак се решавам, и од име на лауреатите, акцент да ставам на сите оние коишто се вложија во нашата кариера – прво на нашите родители кои несебично дадоа се за ние да одиме напред, на нашите професори, на претставници на македонските институции кои максимално се вложуваат и се ангажираат за ние да можеме да твориме на нашиот пат“ - кажа  Мисиркова.

Таа е првата македонска уметница која имала солистички концерт во „Карнеги хол“ во Њујорк.