Домашните туристи не се доволни за да ја спасат оваа туристичка сезона

Добивај вести на Viber

Станува сѐ поизвесно дека и оваа туристичка сезона ќе пропадне.

Странските гости се во многу мал број, а домашните туристи не можат да ја спасат сезоната. Оваа година ќе имаме многу помалку посетители од Холандија. Пандемијата не е завршена, а појавата и ширењето на новите соеви на коронавирусот, не дозволуваат да се вратиме на нивото кое го имавме пред неколку години.

„Претходните години имавме по 25.000 Холанѓани во сезона, и тие доаѓаа од 1 мај до октомври, а сега ќе имаме некаде околу 5.000. Имаме дел полски туристи, но генерално е мал бројот на странци. Ќе бидеме со загуба. Секаде е слабо, и во Грција има помалку туристи, но сега во овие пандемиски услови, сите држави се трудат да привлечат гости. Ова време треба да го искористиме за вложувања во инфраструктура, затоа што тоа ќе ни се врати понатаму, да се подобри хигиената. Треба да им се помогне на домашните работодавачи кои вложуваат во нешто долготрајно“, вели Крсте Блажески, претседател на Хотелиерската асоцијација на Македонија (ХОТАМ).

Тој објаснува дека ќе ни требаат најмалку две до три години за да има туристи како пред почетокот на пандемијата. Но, нагласува дека многу луѓе останаа без работа, во меѓувреме се соочуваме со инфлација, така што ќе треба време за стабилизирање  на целокупната економска ситуација, а кога приходите ќе се нормализираат, граѓаните ќе можат да си дозволат да одат на одмор.

Во Дојран и ова лето одмораат домашни туристи, а дел од српските граѓани кои одат на море го Грција, свраќаат за да уживаат во Дојранското Езеро.

„Освен домашни гости, имаме и Срби, иако тие се во помал број од лани, но се надеваме дека по 15 јули ќе ги има во поголем број“, додаваат од хотел во Дојран.

Во Општина Ресен има доза на оптимизам и се надеваат дека бројките нема да ги разочараат.

„Веќе е раздвижено, и очекуваме дека ќе имаме доста домашни гости, но и наши иселеници кои се вратени во земјата на одмор. Се надеваме дека ќе биде полно за викендите, и самата уреденост на плажите овозможи еден поинаков пристап“, изјави Ајман Ал Маала, раководител на секторот за животна средина во Општина Ресен.

Македонија загуби 144 милиони долари девизен прилив од странските туристи поради пандемијата во 2020 година. Годишниот извештај на Агенцијата за поддршка на туризмот покажува дека минатата година биле остварени 252,05 милиони долари од странските посетители, додека една година претходно сумата била 395,92 милиони долари.

foto Wikipedia