Досие Рој: Треба ли Македонија да стравува од дарежливиот бизнисмен од истокот?

Добивај вести на Viber

Индискиот милијардер Субрата Рој, веќе неколку дена ја бранува македонската јавност. За едни тој е „спасителот“, како што го нарекуваат кој земјава ќе ја извелече од економската криза, градејќи го Дубаи во Охрид. За други, судејќи според натписите на дел од светските медиуми, станува збор за измамник, кој најверојатно нема ништо „бесплатно“ да изгради во земјава.   Субрата Рој си замина од земјава, но, контроверзите за него остануваа да ја брануваат македонската јавност. За индискиот милијардер кој деновиве се шеташе по скопските и охридските улици, придружуван од висока владина делегација од Македонија, светските медиуми објавија дека Врховниот суд на Индија го осудил поради финансиски малверзации. Според пресудата Рој сега мора да им врати 4,5 милијарди долари на околу 30 милиони измамени граѓани. Запрашан за оваа пресуда и пишувањата на медиумите, Рој на македонските новнари им одговори дека тоа било дело на конкуренцијата но, не кажа ниту збор за пресудата на Врховниот суд на земјата од која доаѓа. Сепак, порача дека во Македонија, веќе не се чувствува како странец и дека ќе го направи најдоброто за оваа земја. Но, освен во Индија, негативни реакции за милијардерот има и од Бангалдеш, каде неговата компанија исто така најави дека сака да инвестира. Од тамошната влада побарал земјиште за да гради станови. А, запрашан од новинарите  за тоа каков ќе биде ставот на неговата компанија, доколку еколозите изразат загриженост во врска со неговиот проект за домување, Субрата Рој изјавил, "Ако најдат реални причини, Сахара е секогаш подготвена да го реши тоа ." Освен во градежништвото, предлози за инвестиции дал и во уште 10 други сектори. За посетата на Бангладеш Рој изјавил „По Индија, ова е земјата, која ми се чини како мојата земја. Водењето бизнис не е единствената причина за да дојдам овде. Имам една емотивна приврзаност со оваа земја, бидејќи моите семејни корени потекнуваат од Бангладеш. " Но, откако Рој го презентираше својот инвестициски план во Бангладеш, реагирале бизнисмените на водечките компании за недвижности, кои според пишувањата на медиумите изјавиле дека „Субрата Рој во Бангладеш не дошол да инвестира туку да ограби јавни добра, ветувајќи им на луѓето станови. Тие се меѓународни рекет криминалци и мора веднаш да бидат спречени да во измамата на невини граѓани.“ Македонската влада засега не е загрижена за контроверзите за милијардерот. Министерот за финансии Зоран Ставрески, изјави дека сето тоа било прашање за правниот систем на Индија, а за нас е важно да се реализира тоа што ќе се договори. Колку закони ќе треба да се променат за инвестициите на Субрата Рој? Субрата Рој, најави изградба на луксузен туристички комплекс во Охрид. Љубаниште ќе заличи на Дубаи во 2020 година. За проектот што се обелодени во јавноста реагираа и еколозите. Иако, проектот се уште не е официјален и не добил конечно одобрение, и познавачите велат дека ќе го почекаат неговото официјализирање за да можат да го кажат својот став, сепак потенцираат дека она што првично е покажано во јавноста ќе значи многу променети закони, но,  и многи нарушувања на природата, што не смее да се дозволи особено бидејќи станува збор за Охрид, град кој е под заштита на Унеско. А, Владата веќе скрои измени на дел од законската регулатива во земјава за која се толкува дека е сторена во интерес на Субрата Рој. Закон за автокампови Владата пред крајот на минатата година донесе нов Закон за автокампови во Македонија. Во Законот, пишува дека „Изградбата и изведувањето на работите за основање и работење на автокамп е од јавен интерес“. Ова предизвика бурни реакции во јавноста, бидејќи со прогласувањето на автокампот за јавен интерес, државата (согласно Законот за експропријација ) ќе може да одземе нечиј приватен имот заради изградба автокамп. Земјиштето на кое ќе се градат автокампови (сеедно дали е државно или одземено од приватни лица) ќе се продава по едно евро за квадратен метар. Додека за пратенците од владејачката ВМРО ДМПНЕ со овој закон се регулира начинот за основањето автокамп, постапката за отуѓување на земјиште наменето за автокамп, како и условите кои треба да ги исполнат корисниците на автокамповите, пратениците од опозциската СДСМ , тогаш реагираа дека ова е криминален закон бидејќи е предвидено дека автокамп е јавен интерес, што значи дека на граѓаните може да им се одзема приватен имот и потоа државата да го продава по едно евро. Дополнително опозицијата посочува и дека овој закон се носи заради барањата  на индиецот Субрата Рој. Аеродром на вода Пред некоку дена и предлог- Законот за дополнување на Законот за внатрешна пловидба, по скратена постапка, со кој се создава правна регулатива за функционирање аеродром на вода, доби поддршка од собраниската Комисија за транспорт, врски и екологија. Со предложените решенија  целосно се уредува обележувањето подрачје на аеродром на водена површина, начинот на полетување, слетување, маневрирање и оперирање во границите на аеродромот на таква површина, како и местата, начинот и условите за слетување на хидроавион вон аеродромот на водена површина. Медиумите изградбата на аеродромот на вода во Охридското езеро веќе ја поврзаа со интересот на Индиецот Субрата Рој за изградба на лукзузен хотелски комплекс во Љубаниште. „ Аеродромот на вода во Охрид нема да се гради како цврста и бетонизирана  градба, туку станува збор за обележување на Охридското Езеро за да се воспостават одредени норми за полетување и слетување“, појасни министерот Миле Јанакиески, истакнувајќи дека се внимава максимално на еколошките стандарди со оглед дека Охридското Езеро е заштитено од УН ЕСКО. Жителите на Љубаниште стравуваат од експропријација Жителите на Љубаниште, се во паника. Тие стравуваат дека по пат на  експропријација земјиштето ќе им биде земено од државата во интерес на инвестијата што ја најави индиецот. И охридскиот градоначалник Александар Петрески изрази стравување дека државата може да стави рака на имотите на Охриѓани и да направи нивна експропријација. Тој се сомнева и во вистинските намери на инвеститорот од Индија, односно убеден е дека во Љубаништа, наместо туристички комплекс ќе се градат приватни апартмани за продавање. Субрата Рој за 5 милиони евра го купи хотелот Славија во Охрид, каде ќе бидат сместени неговите архитекти и работници за време на градењето на македонската Сахараја. Најавени инвестиции на Субрата Рој Најверојатно индискиот магнат ќе добие и уште земјиште, но, не градежно туку земјоделско. Станува збор за агро-комбинатот Џумајлија кој е вториот по големина агро комбинат кој има околу 6.000 хектари обработливо земјоделско земјиште и исто толку пасишта, винарска визба, млин, фарма за крави и овци. Но, најавите на Субрата Рој за градежни активности и купување на земјиште низ Македонија не запираат тука. Тој најверојатно ќе гради и студенски град во Велес. За возврат, милијардерот на Македонија ќе и подари спомен обележје на Мајка Тереза во Скопје на плоштадот Македонија, но засега се знае само дека ќе биде  нешто понизок од споменикот на Александар Македонски. Токму сите овие најави за градежна експанизија на Индиецот, ги отвораат и сомнежите пласирани во странските медиуми, кои посочија дека тој не инвестира туку ограбува јавни добра. И токму поради ова познавачите предупредуваат  дека велат оваа помпезна најава ќе треба да се следи со внимание и од јавноста и од владата.