Драма на Шапка - Хеликоптерска акција за спасување на момче
Објавено во: Македонија 18 Декември, 2016
Вистинска драма се одвивала на Попова Шапка откако 17 годишно момче се лизнало на смрзната карпа претрпувајќи тешки повреди. Групата која го придружувала се обидувала да повика помош, најпрво телефонски контактирале со планинар кој им бил пријател, но потоа лоцирањето и комуникациите биле значително отежнати бидејќи ја загубиле телефонската конекција, најверојатно поради недоволна мрежна покриеност.
Малолетникот и уште четворица планинари останале заробени на Шапка неколку часа на студот, сè додека не биле пронајдени од нивни колеги.
Според информациите на МВР, изутринава во 1 и 35 часот, Д.Б. од Скопје пријавил во полиција дека во 1,15 часот телефонски му се јавил планинар кој со уште тројца планинари се движеле кон Титов Врв, за да му каже дека кај местото викано „Бакардан“ се случило несреќа во која 17 годишно лице од Скопје, се лизнало од замрзната карпа и се стекнало со повреди и е во тешка здравствена состојба.
По два часа, околу 3,15 часот кон местото каде што било пријавено дека се случила несреќата се упатиле двајца планинари опремени со соодветна опрема за пружање помош во посебни услови. Лицата биле пронајдени и со хеликоптер повреденото лице било префрлено до Скопје за укажување на медицинска помош.
На истото место, кај Бакардан вчера во дол падна и 34-годишна девојка, која за среќа не се здоби со сериозни повреди.