Драма со породувањето и судењето на Јанкулоска

Добивај вести на Viber

Викторија Јовановска, директорка на Клиниката за гинекологија(ГАК) изјави за „Независен“ дека досега не е стигнато барање од судот по кое гинеколозите би утврдувале дали поранешната министерка за внатрешни работи Гордана Јанкулоска може да присуствува на судските рочишта.

Добрила Кацарска, судијка во предметот „Тенк“, минатата недела најави дека ќе бара судски вештак да ја преиспита медицинската документација на одбраната и да ја прегледа Јанкуловска за да утврди дали е способна да присуствува и да ги следи судењата. 

Јанкулоска испрати писмо во јавноста во кое се пожали дека била испратена на државна гинекологија, а не на друго место, каде што директорката Јовановска, според обвинетата во случајот „Тенк“, е „блиска пријателка на семејството на Зоран Заев“.

- Јас на работа сум докторка, а не нечија пријателка. И со Јанкулоска би се постапило како кон мајка со дете и кон стара прворотка, и како таква, од мене ќе биде максимално заштитена. Ме прозива лично, без да ме познава и без да има повод за такви прозивки. А, ако лично се прашувам, со неа би постапила како јас да сум на нејзино место и како што би сакала некој со мене да постапува. Ако правиме како што правеше некој претходно, ќе бидеме исти како нив. А, и не е христијански некому да му нанесуваш штета. Барем јас така сум воспитана - изјави Јовановска за „Независен весник“.