ДУИ БАРА ЗАСТАПЕНОСТ И ВО НЕВЛАДИНИТЕ: Реагираат дека во МОК практично ги немало Албанците

Добивај вести на Viber

Демократската унија за интеграција преку соопштение вели дека изразуваат длабока индигнација и силно противење на новиот состав на Олимпискиот комитет на Северна Македонија, со став дека Албанците биле речиси целосно исклучени од раководните и одлучувачките структури.

„Од вкупно 117 членови, само четворица се Албанци, шокантен показател за дискриминаторски пристап што е неприфатлив за една мултиетничка и европска држава. Уште поалармантна е целосната отсутност на Албанците во клучните органи:
• Управен одбор: 0 Албанци од 11 членови.
• Олимписки совет: 0 Албанци од 11 членови.
• Спортски арбитражен суд (САС): 0 Албанци.
• Комисија за етика: 0 Албанци.
• Комисија на спортисти: само 1 Албанец од 6 членови.
• Комисија за маркетинг: само 1 Албанец од 6 членови.
• Спортска дирекција: само 1 Албанец од 5 членови.
• Собрание на ОКСМ: само 1 Албанец од 25 членови со право на глас.
Во поголемиот дел од останатите комисии: правна, дисциплинска, родова застапеност, параолимписки игри, наука и спорт, антидопинг, финансии, е-спорт, надзорен одбор и комитет за дијаспора, застапеноста на Албанците е нула“, велат од ДУИ.

Оттаму соопштуваат дека ова било јасна слика на исклучувачки менталитет што според нив е спротивно на духот на Охридскиот договор, на принципите на еднаквост и на стандардите на демократските држави. 

„Спортот треба да обединува, а не да разделува; да гради мостови, а не етнички бариери. ДУИ бара итно преиспитување на овој состав и обезбедување на пропорционална застапеност на Албанците на сите нивоа на Олимпискиот комитет. Секоја одложување или избегнување претставува удар врз еднаквите права и опасен чекор наназад за меѓуетничката стабилност во земјата. ДУИ останува решителна да ја брани еднаквоста и духот на Охридскиот договор, во секоја институција и во секоја област на животот – вклучувајќи го и спортот“, стои во соопштението на партијата.